憤世嫉俗的人生

公司市務主任

2007-08-22T10:36:00.000+08:00

公司籌備上市， SH 與我討論工作安排。佢話打算招聘新同事接手我的秘書工作，而我將調任為公司市務主任，主要職責:
1. 協助籌備周年業績佈告及新聞發佈
2. 編制參考資料庫以促進管理層之分析及決定
3. 提供數據以協助評估新方案之可行性
4. 協助行政總裁籌劃新業務發展項目

嘩! 睇完知唔知份工要做啲乜??? 早排連續三星期開 OT，負責把同事交來之資料翻譯為英文，然後交給 IPO sponsor。上星期 SH 叫我分析由 research house 提供之報紙讀者數據，因為公司準備與廣州夥伴合作出版報紙。今個星期完全沒有任何工作，日日返工等放工，無聊到死。我真係覺得好迷茫! 起初 SH 話會俾我 take up more responsibilities 及多些參與公司運作，但係我諗我俾人“坤”咗。舉例(一): 於 IPO 事件，我的角色只係一個資料搜集員及翻譯員! 至於其他細節，我一概全不知情亦完全沒有人 update 我。舉例(二): 公司出版報紙，我的參與只係做咗啲數據分析。至於其他細節，亦都係全不知情。
其實我都覺得我現在之職位係幾無謂，根本係好多餘。之前可能SH 諗住做 IPO 會好忙，所以要我全身而退秘書嘅工作，專心做 IPO。其實如果唔係 DW 辭職，我根本都未必有機會參與其中。又其實如果唔係啲同事嘅英文程度咁失禮，SH根本都唔需要找我幫忙。對於新工作，請問: (一) 日後是否只係作數據分析? If yes, then sorry lar, that’s definitely not my cup of tea，要我日日對住啲數字悶都悶死。(二) 究竟我應該從那一方面協助行政總裁籌劃新業務發展項目? 好彩我一早已經打算唔做，以上兩個問題嘅答案對我已經唔重要。但係喺走之前，一定要攪清楚自己的存在價值。我並不是期望自己會有什麼成就，但係起碼都要做個有用嘅人。

心情忐忑

2007-06-29T14:56:00.000+08:00

我真的好緊張呀! 明天有重要消息要宣佈, 唔知老媽會有咩反應?

希望佢會欣然接受事實並祝福我們的新生活。

歐洲之旅

2007-05-31T12:31:00.000+08:00

五月九日晚上, 我們拖著疲倦的身軀, 登上BA028, 開始人生第一次之歐洲之旅!

五月十日, 一早到達倫敦希斯路機場, 乘搭地鐵直達酒店, 放底行李後便急不及待要出外走走。由Regent Street 行到去 Piccadilly Circus, 再行去唐人街。可能因為剛剛落機, 神魂未定, 個人好似喺個海度飄吓飄吓咁。於是決定隨意食了個 lunch 就立即回酒店休息。

五月十一日, 剛抵達 London Eye 就開始下雨, 唔通真係咁黑仔? 一場來到, 點都要上去。好彩後來陽光普照, 倫敦景色一覽無遺。下午去杜莎夫人蠟像館, 咁啱遇著一大群頑皮學生, 他們不但大聲喧嘩, 而且還很粗暴地對待那些蠟像 (又搣耳仔, 又掀裙底)。之後去白金漢宮, 隔住個鐵閘, 見到幾個站著而又眼都唔眨嘅護衛。之後去大英博物館, 自問對歷史文物沒有研究, 所以完全唔識欣賞。之後步行去 Covent Garden, 行咗一陣又開始落雨, 唯有去 dinner, 食咗好多 mussels, 好好味!

五月十二日, shopping 日, 先去 Harrods, 然後去 Oxford Street。得個睇字, 一樣嘢都冇買, 因為實在太貴了。黃昏時間, 乘坐火車前往利物浦。

五月十三日, 期待以久, 終於有機會到 Anfield 現場觀看 Liverpool v Charlton。中午十二時許已經到達球場, 老公居然顛到要像小 fans 般於更衣室外等待球員之到來。企咗成粒鐘, 終於等到啦, 但係就俾人遮住, 乜都睇唔到。三時正, 球賽開始, 現場氣氛熱鬧, 好快就過咗兩個鐘, 賽果係二比二打和。老公話有好多人會羨慕我有機會到 Anfield, 我諗係啩, 因為現場睇波又真係幾精彩!

五月十四日, 又係興奮的日子, 因為可以再次進入 Anfield, 參觀球員更衣室、球場及博物館。當然唔少得嘅就係喺 clubstore 購買大量紀念品, 未見過老公買嘢買到唔捨得走, 原本有機會同 Rafa 影相, 好可惜, 錯過咗!

五月十五日, 一天內去哂所有觀光點, 倫敦塔橋, 聖保羅大教堂, 千禧橋, 唐寧街, 大笨鐘, 國會大樓及西敏寺。之後再到 Harrods 購買手信 (唯一一次的shopping), 最後到唐人街翠亨村晚膳。倫敦行程完滿結束。

五月十六日, 中午乘坐 Eurostar 前往巴黎, 表妹來接車。晚上 Valerie 請食飯, 食咗鵝肝, 搽麵包嗰隻, 冇煎過嗰啲咁好食。

五月十七日, 去羅浮宮睇咗名畫 Mona Lisa, 其他藝術品就唔識欣賞。Lunch 後行咗好遠路去到香榭麗舍大道 (auntie 話好近, 為咗慳錢又唔搭車, 終於行咗成粒幾鐘), 當然係因為要去LV 同凱旋門啦。夜晚食正宗越南餐, 菜式同香港嗰啲好唔同, 非常美味。

五月十八日, 去到巴黎鐵塔已經一點幾, 好多人排隊, auntie 又話要去 LV 買手袋, 唯有明天一早再去過。買完手袋就坐車去凡爾賽宮, 途中發生小意外, 時間耽誤了近一小時。到達皇宮已是關門時間,唯有只在花園逛逛。最開心就係去到富豪酒家, 見到姑姐, 又可以試到姑丈的廚藝。

五月十九日, 一早就到達巴黎鐵塔, 用了一個半小時, 終於到達塔頂。風景優美, 但係就真係高到有啲腳仔軟。離開巴黎前, 再要食多一次 mussel, 真係好好味!

五月二十日下午, BA027到達香港國際機場, 我們拖著兩個迫爆的旅行喼, 滿載而歸地回家去。

理智的愛情

2007-04-27T12:14:00.000+08:00

愛一個人是否可以好理智? 朋友C小姐話佢要同佢男朋友保持距離, 因為佢男朋友話暫時唔可以同佢結婚。其實佢哋之前一向感情要好, 愛得痴纏, 亦已經決定結婚生仔。奈何未來奶奶不知從那裡聽到C小姐的壞話, 於是來一招棒打鴛鴦, 不再認C小姐為未來新抱。再加上男朋友又懦弱怕事, 沒有站出來為自己女朋友講說話。C小姐開始懷疑這個男人是否可以附託終身, 於是就決定減少拍拖時間, 好讓自己可以有更多私人空間。C小姐話佢以前差不多會用盡她所有空閒時間陪男朋友, 連自己阿媽都頗有微言。說真的, 我都已經有兩年沒有見過C小姐, 原來係忙著拍拖。

沒有將來的愛情, 不要也罷。C小姐, 盡快作個決定, 繼續一齊或是做回普遍朋友? 真的不想見妳為了這件困擾的事情而弄得自己消瘦下去!

我的爸爸走了!

2007-03-09T18:12:00.000+08:00

二零零七年三月三日早上，爸爸安靜地走了。

先父於澳門出生，十多歲時來港定居及求學。畢業後，受聘於國泰航空公司。及後，他轉職到大韓航空從事貨運管理業務。在這段日子裏，雖然是充滿艱辛及困難，先父抱著對工作的熱誠及堅持，最終都能把挑戰一一克服。先父坦率的個性和真摰的內心，一直受到同事和朋友們的愛戴。累積多年工作經驗後，先父與友人合作經營空運公司，這肯定是他值得驕傲的成就。就在這段期間，我們一家人移居溫哥華，先父則獨自一人留港工作。他忍受不了分離的牽掛及對家庭的愛護，決定放棄香港的工作，與家人團聚。十年後，於一個偶然的機會，先父被邀請進入一間投資公司工作。對於新工作的挑戰，他也曾付出很大的努力。

先父不幸於二零零四年發現患上腸癌。他勇敢地面對，先後接受共三十二次的藥物化療。雖然被病魔煎熬，但憑著堅強的意志及樂觀的態度，他對生命仍然充滿盼望。有一次媽媽哭着對他說：「您不要離開我們。」他反過來安慰說：「不要哭!我們要堅強!」

先父信主的經過實是神巧妙的安排。信主前，先父對神是沒有感覺及懷有疑問的。於患病期間，神安排了一位牧師向他傳講福音。先父欣然接受主耶穌基督成為他的救主，然後作出決志禱告。

先父一生待人真誠、勤奮工作、愛護家庭，他那堅毅的精神及積極的性格，真是令人敬佩及懷念。

耶穌說：「復活在我，生命也在我。信我的人雖然死了，也必復活；凡活著信我的人，必永遠不死。」(約翰福音11:25-26)

派利是

2007-02-22T17:17:00.000+08:00

過新年，最開心就梗係嗰啲未結婚嘅人啦，因為有得逗利是。其實有資格派利是，亦都好開心架。同事們都喜歡組團前來向我拜年，唔理係真心定假意，互相祝賀一番，派都派得順氣一點。

最好笑係有一個上咗年紀嘅同事(不知道她是否已婚)，找我講工事，然後再講了一連串的恭賀說話。我真的不知道應該怎樣做，是否要派利是呢？可能佢見我冇乜反應，佢就很沒趣地走了。

最騎呢係有兩個素未謀面嘅同事又向我拜年。之前沒有和她們接觸過，亦不知道是於那一個部門工作。喂喂！路人甲和路人乙呀，妳 cheap 我都唔笨，唯有禮貌地回應兩句恭賀說話，然後繼續工作。

同事們呀, 妳哋唔係真係咁等錢使吓嗎??好心妳哋唔好咁厚面皮啦, 妳估我係李x基有大把錢派咩!

阿佘好鬼寸

2006-12-02T23:57:00.000+08:00

昨天被公司委派到『演x家年獎 2006』頒獎禮進行接待工作。出席嘉賓及巨星人數超過二百多人，場面鼎盛。

【我最喜愛女電視藝員】金獎得主是阿佘小姐。可能因為阿佘小姐之前已經得到兩個類似的獎項，所以覺得自己是天下無敵，態度自然囂張起來。當她進場時，眼睛只會向天花板上望着，完全不屑與其他人有任何眼神接觸。因為她是得獎者，所以要為她帶上手花。她的眼睛依然只會向上望，連一聲唔該或一個點頭也沒有。然後當有記者在場時，她的態度就720度改變。要影相就影相，要簽名就簽名，有求必應。

嘩！假到爆！真的以為自己是什麼大人物，慳啲啦！明星都係人啫，一點基本禮貌也沒有。佘小姐那個不可一世的樣子，真是十分醜惡。

表哥的婚禮

2006-11-26T01:38:00.000+08:00

昨天是四表哥的大囍日子，雖然要長途跋涉前往澳門參加婚禮，但是真很替他們高興。

每次出席婚禮，都有一種莫名的歡欣及喜悅。眼見一對新人接受各方好友的祝福，場面感人，頓覺人間溫暖。當看見新人宣讀誓詞時，真的令人感動得差點兒掉下淚來。婚姻是一生一世的承諾，如果能夠找到愛你的另一半，真的不是一件易事。但是我可以很驕傲地告訴各位：「我已經找到了！」

愛是恆久忍耐，又有恩慈。愛是不嫉妒，不自誇，不張狂；不作失禮的事，不求自己的益處，不輕易動怒，不計較人的過犯；不喜歡不義，只喜歡真理。愛是凡事包容，凡事相信，凡事盼望，凡事忍耐。愛是永存不息的。 (哥林多前書13:4-8)

最後想再次向表哥及表嫂說聲：「Congratulations!」

首爾自由行

2006-10-11T18:19:00.000+08:00

剛剛完成五日四夜首爾之旅，好想同大家分享我的感受。

人民 - 與香港人一樣，冇禮貌及粗魯，搭地鐵都係唔排隊。車門一開就橫衝直撞，以九秒九嘅速度霸個靚位。地鐵車廂內有帶着播音機的瞎子進行行乞 (冇錯! 行乞之餘仲有音樂娛樂大家) ，真是奇怪。最離譜的就是有個阿伯於街頭隨意噴鼻涕，差點兒噴到我的購物袋上。乘搭飛機由溫哥華前往首爾途中，空中小姐突然走來問我是否可以把椅背拉直，因為後座乘客 (是一對韓國夫婦) feeling not comfortable!! 真是過份! Feeling not comfortable 就唔好學人搭 economy 啦，應該搭 business 或者 first class，保證 comfortable，做乜要同其他人迫埋喺啲 cheap class 度。我梗係冇理佢啦，睬佢都傻。大部分韓國人都係唔識講英文嘅，永遠是雞同鴨講，十分無奈。

航機 - 乘搭大韓航空，坐位舒適。值得一提的是那個類似石頭鍋飯的飯餐，可說是有生以來食過最美味的飛機餐。

購物 - 購買韓國護膚品比香港便宜，其他貨品就實在太貴了。值得一提的是隨處可見的街頭小攤擋，主要售賣小飾物，價廉物美。

總結：韓國是一個十分平淡的國家，沒有新奇玩意，沒有超值貨品，應該於十年內也不會找到再次重遊的原因了。

辦公室政治，我唔識玩亦唔想玩!

2006-09-11T17:37:00.000+08:00

去年七月，行政部經理辭職(其實係迫不得已地辭職)。是因公司上下對於她的工作態度十分不滿，管理層成機在她申放產假其間，新增行政部主管一職以示鎮壓。後來經理終於明白管理層的不懷好意，唯有離開。主管小姐十指纖纖，雖則只是主管級，但是已經係整個部門的最高領導人。上班一個月後，已開始發覺主管小姐有遲到的情況出現，有時是十點，有時是十一點 (正常上班時間為九時正)。更加過份的是：已經遲到了，還可以施施然買埋個早餐回來慢慢嘆。本人對於她的工作能力沒有任何意見，但是對於她的一副雙面人面孔就十分佩服。初來步到就不時購買各色各樣的零食及小禮物收買下屬之人心，又扮友好地與各部門同事打交道。日子久了，就擺出一副高姿態模樣，同事一個很普通的要求，也要寸寸地說未必會批准。

最近主管小姐忙著搬新辦公室的事務。明明整個上午沒有上班，就聯同其下屬騙說出外工作。真的不明白為何要講大話? 為何唔可以自律? 事情已經不是第一次發生，無論是遲到或是偷懶，都以這個得體的藉口瞞天過海，被人發現後還死不悔改。管理層還以為她工作勤奮，並贈送小禮物以示獎勵。

今天收到消息，主管小姐因為工作表現良好，將於九月開始正式擢升為行政部經理。這是什麼道理，咁嘅人都有得升職加薪，真是十萬個為什麼!唔緊要，本人深信上天自有安排，惡行始終有一日會被發現!

冇可能唔係八號風球

2006-08-04T23:54:00.000+08:00

昨天早上起來，以為已經是八號風球，不用上班。是因之前一晚聽到窗外刮着狂風大驟雨，玻璃也仿似被打破。很出乎意料之外，仍然只是三號風球。唯有立即起床，梳洗準備上班。

當電梯門一打開，我已經感覺到強風的威力，大廈玻璃門也不能夠關上。好心的管理員勸我暫避，待雨勢減弱才繼續上班。當時心想：「已經遲了大到，再等一會，風雨情況亦應該不會有改善。」走過平台，到達屋苑的出口，見到有近幾十人於那裡避雨。繞過人牆，打開雨傘，冒着生活危險地一步一步走向地鐵站。風大雨大，傘子也被吹反。只是那兩分鐘的路程，無情的雨水已濕透我整個身體。

雖則話天有不測之風雲，但係科技日新月異，天文台之預測冇理由會如此不準確。佢哋真係要自我檢討吓，唔好再搵大眾市民之生命來開玩笑。

絕食抗議

2006-07-30T01:08:00.000+08:00

細佬養咗隻貓，係一隻灰白色嘅波斯貓。佢個名叫東東，今年八歲，都算幾靚仔同埋精靈可愛，嗜好係瞓覺同埋食嘢。東東係一隻高竇貓，唔好諗住佢會同你玩，就算連抱吓都唔俾。但係如果你用食物引誘佢，特別係甜品，佢一定會跑住跟你走，甚至會瘋狂地用小手抓你的食物。東東個樣真係好懵，平時又鍾意做埋啲古靈精怪嘅動作，所以甚得老爸老媽嘅歡心。

上個月天氣酷熱又潮濕，東東的一兜貓糧惹來了一些小昆蟲。於是，老爸便於晚上把貓糧收起 (平時係有一兜貓糧長期放於廚房供為食東隨時享用)，以免影響衛生。事情就於那個晚上發生 ......... 東東連續一星期沒有進食沒有飲水。細佬帶佢睇獸醫，又抽血、又驗尿、又照超聱波，都查唔到發生咩事。淨係話好似摸到肚入面有件硬物，可能要做手術。可憐的東東被安排留院觀察，期間仲要吊營養液治療脫水問題。過了三天，醫生仍未可以斷症，細佬唯有再帶東東睇過第二個醫生。醫生話東東一切正常，亦沒有發現肚裡有任何硬物。可能只係突然間討厭食用現有之糧食，所以只提供了開胃藥及提議細佬把食物換掉。

老媽話其實東東係鬧情緒，佢嬲老爸把他的一兜貓糧收起，等佢冇得食宵夜，於是就絕食抗議。估唔到東東咁有性格，識得用呢一招反映意見。而且仲可以堅持到底，絕不罷休，問你怕未？

世界盃有咩咁巴閉

2006-06-11T21:49:00.000+08:00

六月九日相信是全世界球迷嘅大日子，因為世界盃終於開波啦！真的很好奇，人們為什麼會那麼瘋狂？(就連身邊平時只係鍾意行街買衫嘅女同事都話要睇波)為什麼唔瞓覺都要通宵達旦睇直播？那個國家勝出又如何？唯一可以諗到嘅三個解釋：(一) 投注後都要睇吓自己有冇贏錢 (二) 追捧足球明星 (三)人睇佢又睇，隨波逐流，否則與朋友吹水時便沒有話題。

自問是一個足球白痴，我對這項盛事一點興趣也沒有。我所關心的是darling的健康！佢平時已經成日話唔夠瞓，依家仲要這樣虛耗精神，真是令人憂心。藉此奉勸各位超級球迷，睇波還睇波，一定要保重身體，千祈唔好令到身邊愛你嘅人為你擔心。

Worker dead at desk for five days

2006-05-26T10:42:00.000+08:00

昨天收到一個電郵，標題是“Worker dead at desk for five days”。這是一則美國消息，一位出版社職員於座位上心臟病發作死了五天，卻沒有給別人發現。

人情冷暖，人知常情，公司內各有各忙，有誰會理會其他人在做什麼。總之，努力工作，博取表現，升職加薪，就是一般打工仔的最大人生目標。

為什麼人類會咁冷漠?在這樣的環境裡工作會開心嗎?每天返工就好似機械人一樣，輸入程式後就按章工作，完全不需要和別人溝通，完全不需要交朋友。有人話：「在公司裡是沒有真正的朋友，因為各人只會為自己的利益籌謀。於適當的時候，必定會把好朋友出賣或利用。」我十分相信這句說話，幸好我只是公司裡的 small potato，沒有利用價值，故此不需要戴着假面具做人。可是有一些低能白痴同事，知道我是由太上皇那兒調過來的，就以為我是什麼大內密探。不但周圍散播謠言中傷我，還命令其部門之所有同事要和我保持距離。自知問心無愧，只會做好自己本份。事實勝於雄辯，日子久了，我在公司裡是什麼角色，大家都一清二楚。

工作佔了我們人生的一大部分，如果我們能夠從中尋找樂趣，必定命都可以長多幾年！

財多身子弱?? 我都想!!

2006-05-03T11:33:00.000+08:00

近排唔知做咩，唔係呢度唔妥，就係嗰度唔妥。

04/04 左手手臂近腋下位置淋巴發炎，又紅又腫又痛。

23/04 晚上突然忽泠忽熱，手腳無力。瞓覺至半夜突然俾 darling 踢醒，問我個身點解咁磬。探熱後，原來發燒至 101.3 度，立即吃了退燒丸，飲咗好多水，繼續瞓覺。

26/04 身上出了很多風爛，好痕。手、腳、面部都有，連續出咗三日，夜晚特別嚴重。darling 話我係喺公司俾嘢咬，醫生話係皮膚敏感，要戒食蝦蟹、鴨鵝、牛肉及雞蛋。

29/04 晚上條頸突然間好痛。第二日去睇醫生，又係淋巴發炎。

01/05 喺紅磡飲完茶坐小巴去尖沙咀行街，路程只不過係五分鐘左右。一落車已經覺得個頭好唔舒服，行吓行吓開始覺得好頭暈。darling 即刻去咗Citysuper買咗支Evian俾我食藥，之後坐咗喺 food court 休息。真係頂唔順啦，嘔囉！之後番咗屋企，唔理三七廿一就跳咗上張床瞓覺。

我又唔係財多，點解個身體都會咁弱？好彩有公司 medical 睇醫生唔使錢，否則財又唔係多，身子又咁弱，你都咪話唔慘。

弟弟的野蠻女友

2006-04-24T11:30:00.000+08:00

今早老媽打電話給我，訴說弟弟的不是。

事緣昨天老爸老媽跑完馬後，老媽去咗shopping，而老爸就番咗屋企休息。老爸回家時，弟弟和他的女朋友均在家閒着。老媽 shopping 回家後，發現老爸吃了公仔麵作晚餐，然後問老爸:「阿仔唔喺屋企咩?為何他不跟你一起吃飯?」老爸回答說:「不知道啊!剛才回家時還在，不知那時外出了!」老媽十分憤怒並即時致電弟弟問道:「老爸自己一個人喺屋企，你外出吃飯，點解唔通知老爸?」弟弟理直氣壯地答道:「頭先 daddy 瞓咗覺，所以我冇打擾佢! 」(其實當時老爸正在房內看電視)。

其實類似事件經常發生，老媽時常投訴弟弟唔黐家。不是去了女朋友屋企，就是出外應酬女朋友的朋友，不回家吃飯又不預早通知，女朋友一聲號令就隨傳隨到。講真，不知道是我個人有問題或是我弟弟有問題，我對弟弟的女朋友均沒有什麼好感，以前和現在亦是。以前的女朋友十分刁蠻任性又冇禮貌，他們每日只係顧着二人世界，完全沒有把其他人放在眼內。我以為弟弟以前細個唔識諗先至會咁，估唔到現在人到三十，依然戀愛大過天。現任女朋友外表斯文怕羞，實質是大女人一名 (係老媽話嘅)。有一句話老媽都講得幾啱:「如果自己個仔都唔識尊重自己，妄想阿仔嘅女朋友會尊重我。」

我真的很想把老媽的感受告訴弟弟，但係老媽又怕弟弟會唔高興，誤會我們針對他的女朋友。真的不知該怎麼做，弟弟不認為自己做錯，老爸老媽唯有繼續生自己的氣。

偉景樓

2006-04-13T10:09:00.000+08:00

前日牛頭角道偉景樓煤氣大爆炸，釀成一死九傷慘劇。

我姑媽正是該大廈嘅住戶，好彩佢哋安全冇事。事發時姑媽姑丈喺屋企嘆緊下午茶, 突然聽到幾聲巨響，都唔知發生咩事，只係見到有好多煙。佢哋未識驚，繼續嘆茶。過咗一陣，有警察拍門叫佢哋疏散。佢哋先知發生咗大件事，嗱嗱聲飛奔落樓。在無家可歸的情況下，兩老唯有去表姐屋企暫避。食過晚飯沖過靚涼後，佢哋話要番屋企瞓覺。其實表姐有叫佢哋留底，奈何屋仔細細，怎樣可以容納到咁多人，所以佢哋堅持要回家。

昨天大廈已陸續恢復電力及煤氣供應，但係來水及電梯服務仍是要暫停。一日三餐點算好?唯有行樓梯落街食飯。我咁後生都好怕行樓梯，更何況佢哋係老人家，真係替他們辛苦!

我的朋友失蹤了

2006-04-09T17:03:00.000+08:00

尋晚原本約咗個成年幾冇見嘅朋友食飯，但係由前日開始call佢想confirm個地點，一直都同佢聯絡不上。

有時真係有啲嬲佢!!就算佢係唔想見到我，佢都唔應該咁無交帶。起碼都打個電話來，是但搵個理由推我吖，又或者一起初就唔應該答應我出來食飯。佢已經唔係第一次係咁架啦!!之前約佢一係就話好忙唔得閒(忙都要食飯架，我就唔信佢一年365日都咁忙)。一係就到食飯當日人間蒸發，個電話打極都冇人聽。事後更加唔會打番電話俾你解釋放飛機嘅原因，只係會不了了之。

佢以前唔係咁家，我真係唔知到底發生咗咩事，如果真係因為我做錯事得罪咗佢，起碼都俾我得個明白。

我要做運動

2006-04-09T16:53:00.000+08:00

清明節當日我同darling去咗行山，行鰂魚涌至大潭水塘嗰條行山徑。我哋當然冇行哂全程啦(全程要四小時)，想死咩!一定係因為太耐冇做運動兼且係上山嘅路，行咗10分鐘已經開始喘氣。不過好彩嗰日唔係好曬，我同darling慢慢行，當係拍拖散步。大概行咗45分鐘，終於到達第一個休息點。嗰度原來有BBQ場同埋一片大空地供遊人玩樂，有人打羽毛球，有人踢波，有人慢跑，有人爬鋼架 ... 最特別係有一條腳底按摩路，原來行上去真係好痛好痛，唔係講笑。休息咗20分鐘，我哋就回程落山番屋企。距離行山日已經第四天了，對腳仲有少少痠痛!!

我尋日買咗頂泳帽同埋潛水鏡，準備去游水之用。多做運動，人都健康啲。

見工(應該)衰咗

2006-04-08T00:32:00.000+08:00

前日去咗見工，足足見咗2小時45分鐘。去到首先要填份 application form，然後個 HR 職員就叫我攞身份証、reference letter 同 certificate 俾佢對資料。對完之後佢想攞我啲 document 去影印，我梗係即刻嗌住佢，問佢想點?我話我唔想俾啲文件佢影印，佢好似有啲難為，然後話要問吓 supervisor 先。

接住下來就係一連串嘅tests。首先要考powerpoint，然後係excel，跟住要做一個性格分析測驗，跟住就要用英文寫一個 prosposal about handling multi-tasking environment。

最後就係見 HR 主管，佢問咗好多 typical interview questions。最難答就係要用國語介紹自己嘅優點，我一樣都講唔到。然後佢叫我是但用國語講啲嘢，例如有咩嗜好，我都係一樣都講唔到。到最後佢話我好有機會會有second interview，佢問我點解唔肯俾啲資料佢哋影印，因為其實係佢老闆要睇。我話如果真係有機會second interview，我一定會俾佢影印。依家唔俾，都係想 protect 自己啫。

仲有仲有，份新工係要番星期六嘅。我真係唔係好習慣，因為依家都唔使。其實香港政府都推行五日工作制啦，有乜理由一間美國公司居然仲要番星期六咁落後!!!

見工

2006-04-01T01:44:00.000+08:00

尋日收到個電話, 居然有人叫我去見工。其實封信都寄咗成兩個禮拜, 差啲都唔記得自己有申請過。

我申請個 post 係 Executive Assistant。個 HR 職員話個 interview 要預個幾兩個鐘, 因為要做個英文嘅 written test 同埋性格分析測驗。我都好耐冇見過工啦, 乜原來依家仲興做呢啲測驗家咩?

佢叫我要帶一張相片同埋以前公司嘅 reference letter。最奇怪嘅係佢叫我帶現職嘅 employment contract 或糧單, 以証明我依家喺邊度做嘢。吓? 佢都未話請我, 點解我要俾啲咁私人嘅資料佢?? 我諗我只可以俾佢睇, 但係絕對唔會俾佢影印!!

俾 darling 嚇死

2006-03-29T15:44:00.000+08:00

今朝唔知瞓到幾點，突然間俾 darling 嘈醒，佢話個背脊好痛。其實佢已經唔係第一次係咁，之前頸痛去睇醫生，醫生轉介佢去做物理治療。個物理治療師仲幫佢做刮痧，刮到條頸瘀哂，好似俾人虐待完咁。所以今次佢話個背脊痛，我都冇大驚小怪，繼續瞓覺。

到咗十一點幾，darling call 我話醫生驚佢係爆肺，所以叫佢去照 X-ray (因為佢話個背脊痛到令佢呼吸困難)。我聽完即刻擔心到死，唔知佢有咩事，仲想即刻請假去睇吓佢。點知佢就話唔同我講啦，要祈禱。算吧 ... 擔心都係白費心機，因為神一定會保守佢。

睇完 X-ray 片，醫生話佢個肺冇問題，應該只係肌肉痛啫。其實我都叫佢平時要做多啲運動，減吓肥，等個身體負荷冇咁重，人都會健康啲。

超級電視迷

2006-03-27T18:03:00.000+08:00

我係超級電視迷，乜嘢電視節目都鍾意睇，但係最近香港的電視節目實在令我好失望。

近排唯有時時煲劇，無論係日劇、韓劇或台劇都統統唔放過。剛剛看完一套台劇『愛情魔戒』。劇情有少少悶及少少煩，但係都堅持睇到大結局 (結論：不妨一睇)。之前又睇過『惡魔在身邊』(楊丞琳做嗰套)。開始時都係覺得佢有少許白痴及浮誇，但是越睇越好睇 (結論：一定要睇)。再之前又睇過韓劇『悲傷戀歌』 (權相佑及金喜善做嗰套)。除非你真係好鍾意嗰兩個男女主角，否則我勸你都係唔好浪費時間。因為套戲都幾悶，節奏又慢，個女主角集集都喊，我就一路睇一路鬧 (結論：可以唔睇)。

最近有個朋友話會借套『美妙人生』俾我睇，真係好期待呀!